अरे आफु भल त जुग भल-Wrote By Gharwali PoetLaxman Negi Charan

 

उत्तराखंड की लगूली

बालकृष्ण डी. ध्यानी ने प्रकाशित किया  · 1 घंटे  · Pauri, उत्तराखण्ड, भारत  · 

#गढ़वळिम_कविता
अरे आफु भल त जुग भल

अपणा मनै मन, कुज्याँणि कन सोचदा,
कि मैं ही सच्चु छ, बाकी सब ठरकिबाज|
और जेथै हम सदिन्याँ अपणा सोचदिन,
सु ही आखिरकार डंसीलु सांप निकलदिन||

आफु मा त सभी देवता छिन,
तब स्या दैतों जन काम क्वा कनु|
मेरू त मन बिल्कुल गंगा जल छ,
तब आपस मा फसाद क्वा कनु||

मिन त कभि झूठ नि बोली,
ना कबरि कैकी चुगुली करि|
ऐथर-पैथर सबौ की गिचु देखा,
एक दूसरे काट सुणि सुणि मरि||

सभि अपै बिपदा मैमा सुणैदा,
सच्चु मनै बात मैमा ही बोलदा|
मिन कभी तौ की छ्वीं नि सराई,
तब सुदि-मुदि आग कैन लगाई?

मनखि भितरों जै-जै छ्वीं मिसाँणा,
कखि त मल्य मेरी काटैण लगाँणा|
आफु चलचलकार नौणीं जन डिपुलि,
मैमा भी चिफली गिचु लगाँणा||

आफु तै तुम सीधु जलेबी ना सोचा,
लुकारि छ्वी तुम भी त खूब सरौदि|
मनखि जात सब एक नार हुँदी दिदा,
तुमरू भी त दूसरों देखी जितम जलदि||

ह्वे सकि गिचु चुप धरा तुम,
अपै मनै बात मन मा हि धरा तुम|
अपणु भलु भि तभि हुँदि दिया,
जब दूसरें बारों मा भलि सोच धरा तुम||

अपणी छ्वी क्वीं झूठी नि बोलदि,
अपणै मनै काट क्वीं सहन नि करदि,
अपणा हाल चाल देख की बोला बल,
अरे आफु भल त जुग भल||

स्वरचित- लक्ष्मण नेगी चारण
ग्राम- सुतोल (सुगड़)
नन्दानगर विकासखण्ड चमोली
प्रबंधक- गुरुकुल संस्थान, गोपेश्वर (चमोली)
#लक्ष्मण_नेगी_चारण #पौड़ी_गढ़वाल #टेहरिगढ़वाल #कुमांऊ #uklaguli #posts #poet #kumaoni #worlpoetry #indian #Poetry #सल्ट_अल्मोड़ा #india #gharwalipoems #video #poems #Ghrwali #gharwali #instagram #Youtube #facebookpost #uttrakhand #सुतोल #नन्दानगर #चमोली 

कम देखें

— उत्तराखंड की लगूली में भाग्‍यशाली महसूस कर रहे हैं.