उत्तराखंड की लगूली, उत्तराखंड की लगूली में आभारी 
महसूस कर रहे हैं.
फ़ेवरेटPauri, उत्तराखण्ड, भारतएक गीत
---------
रुवां की डलुणि फुडैं धोळि जा ।
स्याणि गाणि सबि घाम लगैकि ।
जरा हैंसि जरा खुसि फोळि जा ।।
चिरफड़्यां जिकुड़ा सिलणा को ।
तू स्यूण गुस्तनु ल्हे निखोळि जा ।।
उधड़्यां स्वीणों थैं तुलपाणा को ।
धागों की गुंडी पेचक बटोळि जा ।।
मेरि स्याणी गाड़्यूं का पाणि मा ।
छर्वळि का रंग जन छरोळि जा ।।
मेरि हैंसि खुसि रमछ्वळै जालि ।
सुरुक कंदुड़ु मा कुछ बोलि जा ।।
गंगपर्या बळ्दु का सौदेर जन आ ।
मेरि जिदंगि की जुंट टटोळि जा ।।
मि त अपणा दिनमान बांधि द्यूलु ।
तू मेरि रौंतेलि रुमुक खोलि जा ।।
जिदंगि का ढब भि उलखणि छन ।
कुछ खैति जा तू कुछ बटोळि जा ।।
राशना की दुकनि का ग्यूं चौंळ सि ।
म्यारा अदरणा भरमणा तोलि जा ।।
कभि सुदि भि बेबात भि हैंस जादि ।
खितकड़ियू मा अंदड़ा कतोळि जा ।।
अपणि डाउ पिड़ा कैमा नि बतांदा ।
पर कभि कभि अपणों मा बोलि जा ।।
जा तैर जा जिदंगि की नयार थैं ।
बौ काट अर पाणि थैं खरोळि जा ।।
हिकमत छैंच अभितलक "पयाश" ।
अतर गाड गदनों मा तू बोलि जा ।।
©® पयाश पोखड़ा
पौड़ी गढ़वाळ उत्तराखंड भारत
संदेश
0 टिप्पणियाँ