गज़ल ***** पाणि

गज़ल

*****

पाणि 

बरखा डरैक क्य मील ।

गदनौं तरैक क्य मील ।।

पाणि आस मा चोळि ।

सरग खरैक क्य मील ।।

पस्यौ त नि छटकु वैकु ।

मीनत करैक क्य मील ।।

ढै आखर नि रट साका ।

सकोल चरैक क्य मील ।।

सदनि माया को मुंडरो ।

जवनि जरैक क्य मील ।।

द्वि सारी बुसिला छाया ।

सट्ट्यूं झरैक क्य मील ।।

वो दिनमान हंडेणु रैंदा ।

घारमा ठरैक क्य मील ।।

खालि खल्टा छाया वो ।

अंगुठा धरैक क्य मील ।।

सरकरि नौकरि लापता ।

फौरम भरैक  क्य मील ।।

अपणो खून बिरणु ह्वे ।

त्वै ज्यू मरैक क्य मील ।।

सब सिकंदर छन यख ।

दुन्याथैं हरैक क्य मील ।।

बांजि पुंगड़िम 'पयाश' ।

वाडा सरैक  क्य मील ।।

©® पयाश पोखड़ा

मेरा ब्लोग्स

https://balkrishna-dhyani.blogspot.com/

https://dhyani1971.blogspot.com/

आभार 

 पयाश पोखड़ा

http://www.merapahadforum.com/

में पूर्व प्रकाशित -सर्वाधिकार सुरक्षित