मी प्रधान हेतु. (व्यंग मात्र ) Gharwali Poetry Written By Sandeep Garhwali

मी प्रधान हेतु. (व्यंग मात्र )

..................................

मी जन जुझारू तुम थै.

खोजि नि मिलणा कु

सब्यूकु जु खयाल राखु

यन हैकु नि हूणाकु......

नमस्कार मी प्रधान पद हेतु ...............

गौंकु चौमुखी विकास ह्वालु.

फ़ैलास कैकि गोर चारला.

चौ तरफ़ बन्जि रालु....

सुख शान्ति रैली गौंमा.

जब झगडा नि ह्वालु

कैकु उज्याड नि खयालु.

नमस्कार मी प्रधान पद हेतु.............

गौ गालो कु विकास ह्वे जा

म्यारु एकी धेय चा.

लोग भुना यु पद पद नी

पैसो की ब्वे च.

भैजी नमस्कार मी प्रधान पद हेतु.............

खडिन्चा खौलू चकडाम खौलू.

बगत फ़रि सर्या गौ खै द्यूलो.

स्वास्थ्य पाणी जयान भ्याल मा

ब्वाडा त्वेकु पव्वा दे द्यूलू.

ब्वाडा नमस्कार मी प्रधान हेतु.............

बाल न महिला मंगल दल रालु.

विकास बस फ़ोटु मै दिख्यालू.

बोडी तु चिन्ता न कैर.

त्यारा हाथ मा भी स्मार्ट फ़ोन रालु.

बोडी नमस्कार मी प्रधान पद हेतु...................

भुलाओ तुम चिन्ता नि कारा.

तुमखुण भी कुछ जुगाड ह्वालू.

खेल सामान कु दगडी तुम कु.

गिलास बोतल कु इंतजाम ह्वालु.

भुलाओ नमस्कार मी प्रधान पद हेतु..............

दीदी भुली अर ब्वारी भाभी.

तुम थै भी ब्यस्त रखे जालु.

वट्सएप अर फ़ेस बुक मा तुमखुण.

एक चैटिन्ग ग्रुप बणये जालु.

दीदी भुल्याओ नमस्कार मी प्रधान पद हेतु..........

सन्दीप गढ्वाली ©®

*************************