अकल दाड़
समै चल दगड़या ठंडू मठू कै की चल
अध बठा मा छौं घड़ेक जग्वलदी चल
होली अबेर देख अबेर निगोड़ी होण दे
सस्योंण दे सांस दगड़या सांस लेण दे
उकाल्यू बाठू टेक्वा ना लाठू हेरदी जै
दानु शरैल घुंडा पिड़ांदा दानेष्ठी देखी जै
समौ दगड़ा भलू निभै दगड़या रगरै ना
अनित्य ये चोला सारू देण बिसरी ना
अवगुणू फंच्चू यु पिंजरा तुत जणदी छैं
तेरा हथुम भागै लकीर ठंडू मठू खींचदी जै
चार ऐक दिन जीणौ ज्यू बोनू मानी जा
जाणू अटल जणदू छौं घड़ेक रूकी जा
मि पता च तेरी भी रफड़ा तफड़ी कुदरती
रूकण थकण नी बीतदु जाण च नीयती
मन का दंदोल छीं दगड़या लाणू छौं त्वेमा
ज्वानी मा चितै नी अकल दाड़ बुढापा मा।।
©® भगवती जुयाल गढदेशी
उत्तराखंड की लगूली
संदेश
0 टिप्पणियाँ