गज़ल
*****
गुजर बसर हूणी
सराद खाणा को रंगस्यळेणा छन ।
ब्वै बबौं कि कत्गा कदर हूणी चा ।।
आवा देख जावा पंचैती का चुनौ ।
यख काणा गरुड़म गदर हूणी चा ।।
ठांठि अर ट्वप्ला खुटौं धर्या छन ।
सबुकि इज्जत दर बदर हूणी चा ।।
रौला बौला गाड गदनि सुख गैनि ।
पर नेतौं की नयार अतर हूणी चा ।।
बरखौं मा रुझणु च तेरो भू-कानून ।
सरकार बल कागज-पतर धूणी चा ।।
कुनश दूदि का दांत अभि नि टुटा ।
नेतौं की उमर साठ सतर हूणी चा ।।
क्यां खुणै तुम जिंड जळाणा छवा ।
देख जिकुड़ि कतर-कतर हूणी चा ।।
तेरो विकास देखि क्वी खुस नि ।
कखि न कखि त कसर हूणी चा ।।
भौत दिनुम आंखि उगड़णा छन ।
चल दवै कि कुछ असर हूणी चा ।।
©® पयाश पोखड़ा
संदेश
0 टिप्पणियाँ