एक गजल ( दगड़्या ) Grhwali Poetry wrote by Jagdish Garhwali

 

UKLaguli

उत्तराखंड की लगूली is in India.

Published by बालकृष्ण डी. ध्यानी  ·   · 

एक गजल दगड़्या थै समर्पित ( दगड़्या )

**********

मि वन्नि नि छौं जन तु चिता्ंद्यि रै त्यारा सौं दगड़्या

तु यन्नि बि नि छै जन मि चिता्ंद्यु रौं त्यारा सौं दगड़्या

सौंण-भादों बरखै लरत्यो गाड-गद्नी पाणी-पाणी ।

चोळि सि टबळाँद्यु रौं त्यारा सौं दगड़्या ।।

इगाश-बग्वाळ ऐन् देळी-द्वार द्यू नि बाळी ।

जिकुड़ी का चिनगरा सिळगांद्यु रौं त्यारा सौं दगड़्या ।।

मकरैंण-पंचमी कौथगे्र बार ऐई त म्यार कै कामक ।

थाळ मा यकुलि रकरयाँद रौं त्यारा सौं दगड़्या ।।

बिन बसन्त कि कन रौंस अईंच धरती मा ।

गैंणा फ्योंलि थै पैरांदु ग्यों त्यारा सौं दगड़्या ।।

हिमालै सि चिट्ट माया कि रै ओट ।

बर्फ त्वारों पर जमांदु ग्यों त्यारा सौं दगड़्या ।।

ढाई आखर बिंगे नि जाणी सवोर यन्नि रै अपुण ।

लोक-लाज जाणी शरमान्दु रौं त्यारा सौं दगड़्या ।।

तु जून ह्वेग्ये हैंक मुल्कै अब ।

औँसि चकोर सि टपराँदु रौं त्यारा सौं दगड़्या ।।

नौ ल्यू कनुकै ल्यू दुनिया रै डौर ।

हथगुल्यों लिखदु-मिटांदु ग्यों त्यारा सौं दगड़्या ।।

हुँगरा दीणा रैं जु बथु मा भग्यान रैं मनखि ।

अफु दगड़ अफिक बच्याँदु रौं त्यारा सौं दगड़्या ।।

सारु-सारु फटगैक भ्वरदा गैन लोग ।

रकरै -रकरै टूँडा बिराँदु रौं त्यारा सौं दगड़्या ।।

जिन्दगी उतार-चढाव म थक छौं,खैरि आई ।

बाटू सैंणु-सैंणु खुज्याँदु रौं त्यारा सौं दगड़्या ।।

आँख्यूं अज्यूँ तक वनि च अन्वार ।

भलै बेर-बेर ऐना नम्बर बदलाँदु रौं त्यारा सौं दगड़्या ।।

खूण-पाणै पुछदिन जु लोग मिथै ।

पाठ जोग-संजोग कु पढा़ँदु छौं त्यारा सौं दगड़्या ।।

इन नि चितै कि जगदीश लिख्वार ह्वे ग्याई ।

गजल मा खुद तेरी समलाँदु छौं त्यारा सौं दगड़्या ।।

स्वरचित सादर

© जगदीश गढ़वाली

ग्राम खरका,पत्रालय पुन्डेरागाँव (सतपुली)

,पट्टी कौडिया (जयहरीखाल),पौड़ी गढ़वाल उतराखंड.

#uklaguli #instgram #उत्तराखंड #facebook #reel #youtube #twitter #blogger #utterakhand #shorts #post #gharwal #poem #पौड़ी_गढ़वाल #उत्तराखंड_लगूलि #उत्तराखंड_लगूलि #posts #poet #indian #Poetry #utter #UKLaguli #Ghrwali #gharwali #instagram #Youtube #facebookpost #uttrakhand #जगदीश_गढ़वाली #सतपुली #जयहरीखाल

See insights and ads

Advertise

All reactions:

57You and 56 others