त्यरा गोँ का डाँडा-काँठा त्वे तैं खुजांणा,,Gharwali Poetry By Radhe Ravindra Rawat

 

उत्तराखंड की लगूली

Published by बालकृष्ण डी. ध्यानी  · osrednSptouum4lu,1f2iva8lco2biraN231uefu0mg9a6ach 00ge2m 79m  · 

त्यरा गोँ का डाँडा-काँठा त्वे तैं खुजांणा,,

त्यरा गोँ का डाँडा-काँठा त्वे तैं खुजांणा,,
घर बौडी व्है जा लाटा त्वे धै लगांणा,,
जै गोँ मा जन्मी लाटा सैंति बडु बनाई,,,
छुवैडीयाँ बुढ़िया बुवै-बाबू तेरा जख सी त्वे तैं रगरियाँणा,,
तेरा गोँ का डाँडा-काँठा त्वे तैं खुजांणा,,
घर बौडी व्है जा लाटा त्वे धै लगांणा,,
जों कुड़ियों मा रै बसेरु सी बणी गें खण्डवार,,
जों चौक अर ढंडियाळीयों खियेलीयों तेरु सी त्वे तैं छां खुजियाँणा,,
घर बौडी व्है जा लाटा सैंति जा सम्भाळी,,
हम्म उजैंण लगियाँ लाटा कु रखोलु जग्वाळी,,
त्यरा गोँ का डाँडा-काँठा त्वे तैं खुजांणा,,
घर बौडी व्है जा लाटा त्वे धै लगांणा,,
सी पोंन-पंक्षी डॉल्ळी-बोटळी,फ्वंगड़ी-पाटळी खुदेंणा,,
बाटी-घाटी गोँ घराट सीब्बी त्वे तैं रगरियाँणा,,
जों बणों मा ग्वोरु चरेंन सीब्बी त्वे तैं खुदेंणा,,
अर बाँजा पड़ियाँ खर्क-मरडा त्वे तैं धै लगांणा,,
त्यरा गोँ का डाँडा-काँठा त्वे तैं खुजांणा,,
घर बौडी व्है जा लाटा त्वे धै लगांणा,,
सरबट जै यख बिटी बणेयी निर्दयी परांण,,
क्य जी छो कसूर हमारू यख खाली बाळुपन्न छो बितांण,
राजी रंय्या ख़ुशी तुम जख आज घर बसांणा,,
हालात कुछ अधमरी सी व्हियीं तब भी लठीयाळl तुम मैंमा नि आंणा
त्यरा गोँ का डाँडा-काँठा त्वे तैं खुजांणा,,
घर बौडी व्है जा लाटा त्वे धै लगांणा,,
उठग्याळीयों मणों कुटुणु हरची प्वोथलियोंन निराशु बणायी पराण,,
जांणी कुजांणी कख हरची लाटा ग्यंडूडी,सैंटुली,अर घुघुती कु घुरांण,,
समलोंणी रै लाटा सिल्वेटी कु ग्गराट, अर जांदरी कु ग्गरांण,,
सी बल्दु की जोड़ी अर भैंसी ग्वोरीयों कु क्य छो कभी रमाण,,
त्यरा गोँ का डाँडा-काँठा त्वे तैं खुजांणा,,
घर बौडी व्है जा लाटा त्वे धै लगांणा,,
सी दुधै की ठिय्येकी,दही की पट्ठी अर छांछी का परेडा जन्न यादों मा रै गीन समाण,,
जों सारियों करीं रोपणी त्येरी सी त्वे तैं खुजांणा,,
तों सारियों का म्यंडा ,पंणीया अर बौला त्वे धै लगांणा,,
कभी रंन्दा छा हम्म फसल पात जन्नी भरी सार लहरांणा,,
आज लाटा तुम्म मुख मोडी गें बणी बांजा झाल्कयों बीच छां खुदांणा,
त्यरा गोँ का डाँडा-काँठा त्वे तैं खुजांणा,,
घर बौडी व्है जा लाटा त्वे धै लगांणा,,
जय श्री राधे, जय वासुदेव
आपका अनुज
राधे रविन्द्र रावत(RRR)
रुद्रप्रयाग जखोली का सुदूरवर्ती
पट्टी बाँगर कु मुन्याँघर रैबासी
#blogger #उत्तराखंड #facebook #intgram #reel #twitter #uklaguli #youtube #poem #post #gharwal #utterakhand #राधे_रविन्द्र_रावत #उत्तराखंड_लगूलि #posts #poet #hindipoem #worlpoetry #indian #Poetry #utter #india #poems #gharwali #instagram #Youtube #facebookpost #uttrakhand 

See less

— in India.