उज्यळु हि उज्यळु

उत्तराखंड की लगूली

हिन्दी   ।  गढ़वाली ।  कुमाउँनी  ।  गजल  ।  अन्य  ।  कवि  ।  कवयित्री  ।  लेख  ।

 उत्तराखंड देवभूमि  I अनछुई सी तृप्ति  I  ढुंगा - गारा  I  आखर - उत्तराखंड शब्दकोश  I उत्तराखंड I गढ़वाली शब्दों की खोज I कुमाउनी शब्द संपदा I उत्तराखंडी यू ट्यूब I  कवितायें I कुमाउनी शब्द संपदा I उत्तराखंडी यू ट्यूब I उत्तराखंड संस्कृतिI कवितायें 

 उज्यळु हि उज्यळु 

उज्यळु हि उज्यळु ह्वै जालु अंध्यरा मा ।

अगर  घड़ेक  सूरज रै जालु अंध्यरा मा ।।

 

सूरज थैं नि गुट्यावा चुचौ दीन द्वफ्री मा ।

कखि घाम फांस नि खै जालु अंध्यरा मा ।।

 

बिनसिरिम बाटु लग्यूं सूरज कब पौंछलो ।

भूक तीस सबि कुछ सै जालु अंध्यरा मा ।।

 

बरखा बादळ बिजुलि अर चौमास लग्यूं ।

सूरज गिल्ली पुंगड़ि बै जालु अंध्यरा मा ।।

 

पाळु ढांडू ह्यूं सबि सूरज दगड़ि हिटणा ।

बगतल फसल पात लै जालु अंध्यरा मा ।।

 

गैणा जोगण जून अंध्यरा का बटोही छीं ।

सूरज भि अपण्यास पै जालु अंध्यरा मा ।।

 

अदनिंदळ्या लोग झणि कब निंद ऐजा ।

कखि सूरज यखुलि रै जालु अंध्यरा मा ।।

 

गीत लगांदा आंद अर गज़ल गांदा जांद ।

सूरज भि उज्यळु थैं गै जालु अंध्यरा मा ।।

 

उज्यळों से भि बिखलाण ह्वै जांद कभि ।

'पयाश'यो पातर मन रै जालु अंध्यरा मा ।।

 

©® पयाश पोखड़ा