खाली,खल्टा,खल्लम-खल्ला !

उत्तराखंड की लगूली

हिन्दी   ।  गढ़वाली ।    ।  गजल  ।  अन्य  ।  कवि  ।  कवयित्री  ।  लेख  ।

 उत्तराखंड देवभूमि  I अनछुई सी तृप्ति  I  ढुंगा - गारा  I  आखर - उत्तराखंड शब्दकोश  I उत्तराखंड I गढ़वाली शब्दों की खोज I कुमाउनी शब्द संपदा I उत्तराखंडी यू ट्यूब I  कवितायें I कुमाउनी शब्द संपदा I उत्तराखंडी यू ट्यूब I उत्तराखंड संस्कृतिI कवितायें 

खाली,खल्टा,खल्लम-खल्ला !

 

काका न ब्वाडा, भैजि न भुल्ला रे,

मेरि डंड्यळि, तेरि तिबरि,

खल्लम-खल्ला रे, खल्लम-खल्ला रे....

 

गगरि न कस्यरि, लारा न झुल्ला रे,

मेरि नवळि, तेरि पंद्यरि,

खल्लम-खल्ला रे, खल्लम-खल्ला रे....

 

गोळण न सांगळ, बन्द न खुल्ला रे,

मेरि मंज्युळि, तेरि उबरि,

खल्लम-खल्ला रे, खल्लम-खल्ला रे....

 

खुम्का न वीरा, घ्याळ न हल्ला रे,

मेरि उर्ख्यळि, तेरि जंदरि,

खल्लम-खल्ला रे, खल्लम-खल्ला रे....

 

ज्युड़ि न दौळिं, गोठ न पल्ला रे,

मेरि थ्वरिड़ि, तेरि कळ्वड़ि,

खल्लम-खल्ला रे, खल्लम-खल्ला रे....

 

दै न दग्ड़्या, पैसा न पल्ला रे,

मेरि सुप्पी, तेरि ठ्वपरि,

खल्लम-खल्ला रे, खल्लम-खल्ला रे....

 

बूण न घार, हिटा न चल्ला रे,

मेरि जांठि, तेरि छतरि,

खल्लम-खल्ला रे, खल्लम-खल्ला रे....

 

त्यूंखी न गत्यूड़ि, थ्यग्ळा न टल्ला रे,

मेरि धोति, तेरि चद्दरि,

खल्लम-खल्ला रे, खल्लम-खल्ला रे....

 

ख्वींडा न अबिंडा, बुरा न भल्ला रे,

मेरि मुण्डळि, तेरि ख्वपरि,

खल्लम-खल्ला रे, खल्लम-खल्ला रे....

 

आंदा भि खल्ला, जांदा भि खल्ला रे,

'पयाश' हमरि, आस तुमरि,

खल्लम-खल्ला रे, खल्लम-खल्ला रे....

खल्लम-खल्ला रे, खल्लम-खल्ला रे....

 

©® पयाश पोखड़ा