हिन्दी । गढ़वाली ।
। गजल । अन्य । कवि । कवयित्री । लेख ।
उत्तराखंड देवभूमि I अनछुई सी तृप्ति I ढुंगा - गारा I आखर - उत्तराखंड शब्दकोश I उत्तराखंड I गढ़वाली शब्दों की खोज I कुमाउनी शब्द संपदा I उत्तराखंडी यू ट्यूब I कवितायें I कुमाउनी शब्द संपदा I उत्तराखंडी यू ट्यूब I उत्तराखंड संस्कृतिI कवितायें
स्वीणौं मा आणि-जाणि
स्वीणौं मा आणि-जाणि,अब को लुकांद ।
आंख्यूं-आंख्यूं मा पाणि,अब को लुकांद ।।
च्यूड़ा अर कौणि की खौंखाळ का दगड़ ।
काठी अखोड़ा की दाणि,अब को लुकांद ।।
दुन्यां की सिक्कासैरि त करण हि प्वड़दीं ।
घारम बौड़ि बेटी बौराणि,अब को लुकांद ।।
ठ्यलेणा छन दिन-रात जनि भि ठ्यलेणा ।
या जिंदगि राइ तंगत्याणि,अब को लुकांद ।।
ऐ जंदि तुमरि भि छुवीं बथा सेकंत-संग्रदि ।
बेरि-बेरि तेरि खुद पुराणि,अब को लुकांद ।।
बैठा कभि दगड़म आवा हमरा ध्वार-धरम ।
तुमरा बांठा की च्या-पाणि,अब को लुकांद ।।
बांजा-बंजर हुयां छन गौं का स्यारा-पुंगड़ा ।
हे घुघती त्यारु दाणापाणि,अब को लुकांद ।।
नवळि पंद्यरौं मा कभि उज्यळा अंध्यरौं मा ।
तेरि चुपचाप आणि-जाणि,अब को लुकांद ।।
जून सि मुखड़ि पर पुरणमस्या टक सबुकि ।
जुनख्यळिम स्याणि-गाणि,अब को लुकांद ।।
ज़िकुड़ि का गीत तुमरि कल्यजि की गज़ल ।
'पयाश' मा छे तू ल्यखाणि,अब को लुकांद ।।
©® पयाश पोखड़ा
संदेश
0 टिप्पणियाँ