दगड़्या दोस्त यार

 

उत्तराखंड की लगूली

हिन्दी   ।  गढ़वाली ।    ।  गजल  ।  अन्य  ।  कवि  ।  कवयित्री  ।  लेख  ।

 उत्तराखंड देवभूमि  I अनछुई सी तृप्ति  I  ढुंगा - गारा  I  आखर - उत्तराखंड शब्दकोश  I उत्तराखंड I गढ़वाली शब्दों की खोज I कुमाउनी शब्द संपदा I उत्तराखंडी यू ट्यूब I  कवितायें I कुमाउनी शब्द संपदा I उत्तराखंडी यू ट्यूब I उत्तराखंड संस्कृतिI कवितायें 

 

दगड़्या दोस्त यार

 

दगड़्या दोस्त यार छुटणा रंदिन ।

यख रोज़ सौं करार टुटणा रंदिन ।।

 

बोलि सकदा न कुछ कैर सकदा ।

यख रोज़ ल्वै  घूंट  घुटणा रंदिन ।।

 

सुखीं आंख्यूंम क्य ख्वजणा तुम ।

यख रोज़ हि छोया फुटणा रंदिन ।।

 

बिसवासै सारी इनि त बांजि रैगीं ।

यख रोज़ बिस बीज बुतणा रंदिन ।।

 

गज़ल का मक्ता निसवदि ह्वै गीन ।

यख रोज़ सब्द सब्द भुटणा रंदिन ।।

 

कभि दगड़्या कभि दुसमन बणकै ।

यख रोज़ अपणौ थैं लुटणा रंदिन ।।

 

झूट को तलखरु  सच को तमाशु ।

यख रोज़  तमसगेर जुटणा रंदिन ।।

 

उर्ख्यळि गंज्यळि रुणीं च 'पयाश' ।

यख रोज़ पछौ सट्टि कुटणा रंदिन ।।

 

©® पयाश पोखड़ा