हिंस्वळि कैगे जिंदगि

 

हिंस्वळि कैगे जिंदगि

 

मिठ्ठि-मिठ्ठि छुयूं मा,

हिंस्वळि कैगे जिंदगि ।

 

मयल्दु माया लगैकि,

तिस्यळि कैगे जिंदगि ।

 

तिर्वळि हिटणु रौं मि,

ढिस्वळि कैगे जिंदगि ।

 

ब्यखुनि फ़जल अबेर,

सिनक्वळि कैगे जिंदगि ।

 

भटुळि खज्याणि रंदि,

किस्वळि कैगे जिंदगि ।

 

सौ समाळि सजबिज,

अंज्वळि कैगे जिंदगि ।

 

पुरणमस्या जून सि,

उज्यळि कैगे जिंदगि ।

 

जिकुड़ि झंझोड़ि की,

निख्वळि कैगे जिंदगि ।

 

मंगत्या बणैकि मीथैं,

फिक्वळि कैगे जिंदगि ।

 

बांज बुरांस का दगड़,

लिक्वळि कैगे जिंदगि ।

 

'पयाश' का पिरेम मा,

कळकळि कैगे जिंदगि ।

 

©® पयाश पोखड़ा