बुलण बच्यांणा
बुलण बच्यांणा कु ज्यु सब्युंँकी बुल्यांद,
लगाण पैरणा कु ज्यु सब्युंँकी बुल्यांद ।
कतगा भी हो समझदार जणगोर आदिम,
जिकुड्युं समाणा कु ज्यु सब्युंँकी बुल्यांद ।
रुणफत ऐ जांदी जिंदगी मां कखिम कबरि ,
फिर भी ज्यूँद राणा कु ज्यु सब्युंँकी बुल्यांद।
उकाळ उंदार त लगीं च जिंदगी रोज यख ,
हौंसिया सी हर्षाणा कु ज्यु सब्युंँकी बुल्यांद।
सुपिन्या पुर्याणा खुणि हडगा तुंण पड़दिन,
पर राजगद्दी पाणा कु ज्यु सब्युंँकी बुल्यांद ।
दुःख त रोज पौंण बणी की आंदु बेर-अबेर,
केवल सुखी राणा कु ज्यु सब्युंँकी बुल्यांद।
भ्यूंचुळ सी हलकै जांँदु ज्यु कु उमाळ "विनु",
कैमा खैरी बिषाणा कु ज्यु सब्युंँकी बुल्यांद ।
©® विनीता मैठाणी
ऋषिकेश पौड़ी गढ़वाल उत्तराखंड
संदेश
0 टिप्पणियाँ